#1
＊圖片眾多，手機用戶請使用ＷＩＦＩ觀看本文，以免數據喪失＊ 之前開過香港既500噸級重型吊機 - 力營 LTM1500
又開過一盒超誇張既日本1200噸級 - 電材重機 LTM11200
之後仲有咩野好玩呢？
![[sosad]](https://hkbf.org/images/smilies/icon_sosad.gif "So Sad"){kind=icon}
ＷＳＩ起２０１９年公佈左一系列既新模具，當中最吸引我目光既就係今次要開箱既呢一架
吊重量750噸，LIEBHERR 大噸位全地面式起重機三巨頭之一，吊風力發電機一樣有佢份
香港既力營重運近年亦有引入同款車型，成為香港境內最重型既吊機，黎到香港佢都參與過行人天橋吊裝，同大廈火牛機房吊裝既工程
佢就係 LIEBHERR LTM1750-9.1 。
等呀等，由２０１９年公佈灰模，到之後第一款LIEBHERR 原廠黃灰色推出，再等到終於有岩心水既公司色彩
等左差唔多兩年，終於有得玩啦！
當中仲有一款「台灣啟德」既吊機其實都好岩心水，二選一既決擇底下，最後都係要左一間我唔識既公司
法國既MEDIACO，唔好問我呢間野係乜，我真係唔識，我真係純粹為左隻車身顏色而買的
講多少少，點解LTM1750咁遲先有模型出？真車其實起２０１２年先發佈，比起500噸同1200噸果兩架都要遲，所以都算係新款吊機黎架
模型其實ＷＳＩ一早就已經有出過LTM1750，但比例係1/87，手功極其量只可以叫做貴價玩具
到真係出左1/50之後，呢舊錢其實已經點都會比出黎架啦，揀好公司色，即課金
至於入手價係幾錢呢。。。一個整數找返$20，大家估下
咁貴買架玩具，我真係癲左呀 睇片時間，以下係模型既實體車，玩模型有架真車可以對住黎望係一件幾過癮既事黎架
我又真係搵唔到呢間 MEDIACO 呢架車做工程果陣既片（其他公司果Ｄ反而有唔少）
搵黎搵去都係佢周街行，但片中都可以見到，全部車軸都有轉向，過窄灣都稱得上靈活
或者你又會問「明明有架１２００噸級既，乜都搵佢吊晒咪得囉，做乜又要設計一架７５０噸既出黎？」
其實１２００噸級既吊機，佢既車重太誇張了，係一定要拆走主臂先可以出街道上行走
為此 LIEBHERR 就出現呢一款降低左噸位既吊機，最大既好處係LTM1750係可以帶齊全部伸缩主臂同前支撐腳，直接駛上公路而又不超重
省卻運輸成本同工地上裝拆主臂既時間，話雖如此，但全車車重其實都去到108噸，對正常路面負荷黎講都非常踩界
講咁多廢話，正文來了
一個巨盒，同埋LIEBHERR原廠色既LTM1750實車做封面，簡單易明咁話比街外人知，呢條友又買玩具啦
盒背，兩架LTM1750吊裝大廈既天幕
成日話巨盒，究竟有幾巨呀？
搵返自己間黃廠出黎擺上去，都唔夠佢長呢
開箱箱，每次開呢Ｄ箱，果種超有份量既感覺係好鬼開心既事，巴模玩N架都比唔到我
介紹一下內容物，說明書一本唔少得
主角模型車，４條支撐腳，配重１８塊，配重托盤，後纜機組，墊地板，超起臂，兩個吊勾，爬梯，仲有袋仔入住既一堆散件
剛剛拎出黎既狀態，４隻支撐腳都冇裝上車到，要自己裝，真車為左減重其實都有機會會拆走
裝返前一對腳，唔駛裝勾住，咁既款就係出街行既裝備啦
真車第2,3,5,6軸都係動力擔，全車車軸都具備可控轉向，可以全部車軸向晒同一方向打斜行都得
主臂既駕駛室行車時就放置起車尾正中間，下面仲有幾支腳仔撐住佢，幾特別
就咁一架車，因為連埋主臂既關係，又係重手到驚既重量啦
全車轉向就係好好玩，不過第３軸轉盡車呔會刮車身，所以都唔可以太指望架車推得郁
而真車起呢個狀態下，車長就有21.96米，高度4米，闊度都有3米，比巴士更闊，所以出路面，幾架開路車跟頭跟尾好重要
然後，裝埋後面一對腳，所有腳都齊晒，可以開枱啦
齊腳之後成個側面即刻整齊晒
車尾，主臂駕駛室就藏左起後腳入面，後腳銀色部份，真車係可以完全收起，唔會遮到尾燈
但今次WＳＩ收到盡都係去到圖中呢個位，４隻腳仔收同放盡既行程都唔長
一D一D咁加上去，而家就裝埋超起臂（ＴＹ）同吊勾，主臂既長度太貼近駕駛室，裝上吊勾後，最前一截既主臂就要伸出少少黎避開
另模型今次支超起臂係有史以黎咁難裝，睇埋圖文並荗既說明書，影上一張相同影呢張相已經用左一晚
裝左超起臂之後，完全感受到個重量啦
後腳亦裝上兩隻「腳板仔」，玩模型玩到連工序都跟埋真實，後腳底座係用「穿邊」打橫裝起油壓腳上，模型跟足的
每次穿纜線都係穿到眼都凸埋，今次都唔例外
同樣，因為車尾角果兩盞燈仔，玩親都要好小心
進入工地現場啦，工人開工啦，原本起車上既兩條梯，今次有較位可以將條梯放落黎，條梯都係金屬造架
支撐腳既細節，墊地板可以將支撐腳既力量平均分散落地面
玩完影完到睇返D相先見，我將塊墊地板上下倒轉左放了
![[banghead]](https://hkbf.org/images/smilies/icon_banghead.gif "我撞牆死左佢算啦！"){kind=icon}
主臂既駕駛室，冇人起入面既時候一樣可以移動，呢一下向上少幅度上升就可以避開４枝支撐腳，避免轉台旋轉時碰撞
另外仲有一枝支撐腳，非常鬼鼠咁起車尾底部的，起冇再多墊地板既情況下，佢放盡都掂唔到地
超起臂上升。。。
加多一列爬梯落去，然後就會出現一條上駕駛室既路線啦，冇錯係要爬高爬低，辛苦工MA
之後就係裝配重同後纜組既時間啦，LTM1750又係可以用自己支臂做晒，唔駛再搵其他吊機幫手
升起主臂之後既車身空間，就係裝配重呢個工序既位置，後纜組既升降動作竟然又可以做到真車一樣，ＷＳＩ係勁既
另外頭兩枝支撐腳既夾角位置，真車都另外有地台板可以裝上去，模型當然比埋你玩啦，人仔可以企晒上去架
裝上配重塊，真實既配重塊，厚既一個十噸，薄既一個五噸
而模型呢，我真係想買個電子磅磅比大家睇有幾重，拎上手大概重過兩架1/43勝利二型，冇誇張的
配重塊，真車係用一支粗針形狀既工具吊裝，模型就當然冇呢支野啦
然後真車配重塊，配重托盤，後纜機組，加埋就重２０４噸，比起成架車連主臂既１０８噸重近兩倍
然後就係轉台背向後纜機，再將配重托盤升起，成堆配重就裝到上車
呢堆配重同下面人仔既SIZE，充分感受到真車係幾有份量
呢個形態下真機肯定好壯觀，模型都係
吊臂既駕駛室岩岩好避開到支撐腳，大吊機永遠就係起有限空間下計到盡
同樣，配重托盤都可以避開支撐腳
玩玩下先發現，駕駛室除左上下升降。。。
仲有打斜呢一下
好啦，講到尾，究竟全展開有幾壯觀呢？？？
咦？咁矮既？開晒架嗱？真車因為車重既關係，主臂計埋最底只得４節，真車全伸展只有５２米
如果真係要再高就要裝fly jib，不過模型就冇跟到呢D附加配件啦
講返轉頭，其實４枝支撐腳，銀色部分既行程伸縮都非常短，伸盡都冇辦法令全車升起離地
唔明點解WＳＩ今次會整得咁保守
之前ＷＳＩ出既吊機都有一塊刻有「LIEBHERR」既長方形鐵塊作吊運物
而今次就變成呢一條吊運排，可以用黎分散纜線既力量同平衡重量，真實感大增
黑色既超起臂唔係做做樣就算架，呢支ＴＹ左右展開３５度角之後，主臂既力量就會大增
冇呢支ＴＹ，會見到主臂有少許下垂，但多左呢支，主臂就多左一道向後既拉力，真車係咁，模型一樣感受到同一件事
ＷＳＩ既作風，主臂既大油壓桿都係用六角匙黎固定，主臂用咩角度都可以好好力
收工啦
勾住果條「圈圈」都係模型跟埋既配件之一，唔係我D手作仔黎架 
好啦，外盒我上面就講左有幾巨型，咁架車呢？成日話大架，我點知有幾大架？
對比既時候到啦，唔好唔記得，呢架車比例係１／５０，而今次拎黎對比就係１／７６同１／４３既勝利２型啦
![[photo]](https://hkbf.org/images/smilies/Photo.gif "傾偈無圖無偈傾")
吊機既真車高度有４米，模型比起１／４３勝利２型略矮少少
車尾對齊之後，多左一架車位既長度出黎
邊有位擺呀？？？放心，我係執左位先買既
特寫留影
ＬＴＭ１７５０—９．１
最後既最後，今次真係最後啦
買左三巨頭返黎，點少得三巨頭合照呢！現實就算係同一間公司，應該都冇咩機會擺得埋一齊啦
大家都係LIEBHERR既產品，車頭當然係一樣架啦，但係三款唔同噸位既吊機，細節，活動位，裝拆位置等都大不同呢
三款吊機既車尾，駕駛倉都有分別，LTM11200就唔會起呢個狀態下出車既
由上而下，５００噸既香港力營，７５０噸既法國MEDIACO，１２００噸既日本電材重機
陣宅三寶呀喂
型到震呀 
吊機其實唔止LIEBHERR一間車廠有出過模型，但儲開呢間就唔想斷纜啦，三巨頭齊人之後，暫時我就未再有目標買多架吊機模型啦
今次真係全文完啦
多謝所有花心機睇晒全文既觀眾
ＴＨＸ ＦＯＲ ＲＥＡＤＩＮＧ ．
