香港巴士論壇

前半部份要踩大量繁忙馬路，驚車膽細經驗少都勿試
我只係純粹分享，唔想見到大家亂試而出事
踩車又好，我打文分享也好，點都要戴返頂頭盔

---

「大冷」
呢個詞彙如果有踩開單車既一定唔會陌生，究竟咩野係「大冷」呢？

冷：取其英文「ＲＯＵＮＤ」既諧音。大冷，顧名思義就係一個大圈，但呢個圈有幾大又點樣睇呢？
送上ＧＰＳ一條，睇過就知，其實就係環繞新界一大圈，岩岩好１００ＫＭ路程，呢條ＧＰＳ好鬼好睇
https://connect.garmin.com/modern/activ ... seU8mV2zlc

---

以下就分享一下路線啦，我係沿地圖順時針方向踩一大圈的（順冷）

難得唔算早既時間出發，１１點先起步，先由孖橋到大圍，全單車徑，最簡單既一段就唔講啦

到左大圍站就要搵路上大埔道，首先要搵到積運街呢條街先，起大圍站既Ｇ出口對出，然後就要開始今日大部份既馬路路段啦
積運街直行一段就要上斜路，一條路上到尾就見到有個細迴旋處，千萬不要左轉沙田嶺路，睇個地名真係會以為係呢到出大埔道
其實直去經下城門道上多少少斜路，下一個路口左轉上橋先係落大埔道既正路，之後落少少斜出路口，正式進入超繁忙既大埔道啦
（姐係７２，８１出九龍果段山路）


全程就跟晒上面兩條巴士線既路段咁行，落山就最好食返行車線正線，唔好靠邊，因為車速有返咁上下快
臨到嘉頓就跟７２咁靠右轉，大冷其實冇特別一條路線死跟的，可以繼續跟７２咁行，又可以直去到西九龍中心


話說前一晚我研究左好耐路線，點樣踩出去荔廠呢？地圖搵到興華街西呢個名，但街景見到條路又唔比單車入
出得馬路就要守返馬路上既規矩，甚麼路權甚麼單車甚麼呢Ｄ負面野比人鬧得太多啦，踩下單車都搞到好似做錯事咁為乜？
所以最後退而求其次，穿過南昌站，Ｂ出口一出就係海盈邨一帶



海盈邨之後，一樣可以接返興華街西，好快就見到荔廠啦

荔廠之後，就會接入貨櫃碼頭南路，原本係右轉的（路名都係叫貨櫃碼頭南路）
但呢到附近有個景點我想黎好耐架啦，一場黎到冇理由唔去下嘛，講緊就係昂船洲大橋橋底 加少少路程兜埋過去啦
（呢一帶閒日會有非常多貨櫃車，絕不建議閒日踩呢頭，如果想閒日玩大冷，去美孚轉入荔景山路吧）




呢個橋底位置就係沿住貨櫃碼頭南路一直行到最篤篤，都係唔識路既就跟住頭頂條橋一齊行啦
然後原路回程，接返左手邊既貨櫃碼頭南路


貨櫃碼頭南路係一條幾長既車路，星期日踩呢頭非常少車，一直跟住南路行，直至見到左手面葵泰路路口就要左轉
之後既路段：葵泰路＞葵景路（跟荃灣路牌行）＞再接返葵泰路＞右轉葵裕街＞左轉永順街 一直去到尾，就會黎到海濱花園
唔識就真係要睇地圖啦，呢段我都研究左地圖好耐，但估唔到咁樣去荃灣，路程比我既感覺係短好多，好快就到


之後入荃灣西站出返海旁，荃灣既單車徑落成左啦，做緩跑徑一流，做單車徑真係短到笑出聲
唯一好處就係多左個廁所位


之後就係我咁多年都未踩過既青山公路（深井大欖黃金海岸段），路點樣行應該唔駛教啦，哈哈
真係唔識既，值得搭一程５３了解一下，遊車河睇風景都好好架
汀九之後有個「機場核心計劃展覽中心」，我諗真係唔會有人專登搭車黎睇呢個館仔，難得踩到黎，出去個觀景台望下，風景又唔錯喎


深井，補給位，大冷黎計就係好在易補給


一直踩到去三聖，記得左轉入海榮路，因為呢到再前行少少就可以接返單車徑
呢條單車徑就係可以一直踩返去馬鞍山既屯馬線（單車徑版）


當然，踩左咁耐都餓架啦，推介屯門碼頭海旁既幾間餐廳，都有室外位置比你坐，睇住架車一流


開完餐，之後就係屯馬線（單車徑版），一條路踩返馬鞍山，新單車徑落成左之後都已經踩過幾次，路程夠長的確好玩
但講左Ｎ年仲未開到工既屯門至荃灣單車徑，駛唔駛等多廿年先有？


踩埋個吐露港，完成環新界，「大冷」一圈 恭喜恭喜

---

「大冷」可能對好多人黎講都係好難，但其實沿單車徑來回馬鞍山至屯門碼頭，路程係長過大冷８ＫＭ左右
但上少左馬騮山同青山公路既上上落落，體力消耗反而冇「大冷」咁大。

另外話「大冷」難唔難呢，踩車１００ＫＭ其實有做開運動應該都可以完成到，反而我覺得路面經驗，唔怕車係難過你完成全段
尤其大埔道馬騮山車速真係好快，我踩過大帽山，新娘潭呢Ｄ，真係只可以講係踩公路既ＢＢ班級
認真的，如果要拎條路對比的話，上大帽山頂絕對難過「大冷」好多好多

唯一不爽係青公比大量ＲＢ爬頭 公車路對山地車，公平咩

---

＊＊冇乜點提過屯馬線（單車徑版），其實有少少貼士，跟住紅色地面既單車徑踩，就係最直接既屯馬單車徑路線，跟住去基本上都唔會有錯


ＴＨＸ　ＦＯＲ　ＲＥＡＤＩＮＧ ．

_________________

麥 景 陶 碉 堡 ． 七 堡 連 走 （馬草壟）

～ 樂 在 香 港 山 與 澗 ． 香 港 就 是 這 麼 美 ～

不爽RB, 就要加入, buy a TCR