未有青馬大橋之前，入大嶼山，每次都係一個小旅行
假日塞爆大嶼山，似乎係咁多年以來不變既定律
無論係行山郊遊，定係拜佛食齋，大嶼山都係一個值得花時間去玩既觀光大島
昔日車路未開通，黎大嶼山就只能夠搭船，梅窩就成為其中一個非常旺場既碼頭
假日一船一船遊客蜂擁而至，以往只有低載量既單層巴士，清客效率非常低
所以就造就左高載客量既雙層巴士出現
80年代初，最深得巴士公司重用既其中一員，當然一定有佢～勝利2型
為應付大嶼山路窄多彎又多斜既路段，而且可以做到快速清客
嶼巴急切須要雙層巴士既協助，甚至直接向九巴購買二手勝利2型
可惜既係舊東涌道，羌山道等既大斜，對行駛雙層巴士都有一定危險性
勝利2型起大嶼山就只有一條嶼南道可以行，其他高客量路線，例如往昂平，大澳，東涌既路線都唔適合行
結果車隊大部分勝利2型，後期都出返去市區，成為城巴接手中巴26條巴士線後既成員
而嶼巴擁有既勝利2型，其中一個特色係車身款式並不統一
九巴常用既FS型，中巴常用既CB型，後期向九巴購買既大銀幕版，都可以起嶼巴到搵到
仲有車頭巨型既「LEYLAND」水牌，都係嶼巴勝利2型既標誌
去相時間
又係勝利2型啦，今次終於都出嶼巴
狗仔廠當年出左唔少1/76比例既勝利2型，但點樣排隊都排唔到嶼巴既款色
結果1/76既嶼巴雞就只有Csm既怪雞同ABC出既錯比例雞，兩款都買唔落手
咁多年過後，終於都出嶼巴雞車，仲要係1/43，邊有得忍手？
![[sosad]](https://hkbf.org/images/smilies/icon_sosad.gif "So Sad"){kind=icon}
今次冇路線牌送，其實都預左，但今次就有一套金屬LEYLAND水牌既蝕刻片，呢塊蝕刻一陣再講
證書，今次九成又係冇版權
新車落地，原裝並無LEYLAND水牌，成架車非常簡潔
車尾，其實唔難發現第一個錯處，車牌位置錯了，真車車牌係貼近下層車窗的
實在唔明點解明明有套岩既模唔用，偏要用出落嶼巴到就會錯既模
開門必試位，今次呢架又係好順，唔錯
內部細節
80年代初，$2.5一程好似都幾貴，7號線梅窩至貝澳，路程其實唔長
手掣啲色有冇咁靚呀？
內籠標籤，落門「由此落車」果幾隻字幾正
之後就係今次既所謂贈品，LEYLAND水牌蝕刻片
認真，我明白點解唔一開始就整個水牌落車到，佢係想大家有多一個選擇可以有或冇水牌
但冇水牌好似都係後期些小既事，紅色車牌既LD2，甚至係初期既其他嶼巴雞，水牌應該都未拆
要自己花功夫去搞唔係問題，但呢塊蝕刻唔係水貼，亦冇任何可以黏貼既物料起底
要黐呢塊蝕刻，難度十分高，由底片到cut字出黎，刀片要夠鋒利
每cut斷接駁位，字就會飛彈出黎，第一粒字就已經差啲因為咁而唔見左
然後就係要對齊所有字，因為水箱蓋凸起左好多，冇可能一次過黐晒7隻字母
先起車頭位置放字母上去試位，再用膠紙對齊左同右共6隻字母
之後先落極少量膠水，再好小心咁將啲字黐上車上
而中間水箱蓋上面既「L」，可以話係最易，亦係最難黐既一塊
最易係因為凸起既水箱蓋令呢個位置就手好多
最難係左右既字已經黐好晒，「L」稍有偏差，就非常影響觀感
但完成之後，值得了，味道返晒黎
蝕刻既質感，水貼係冇得比的，但其實佢如果只係比水貼，我都唔介意
真心，呢幾粒字我驚到手震晒
嶼巴雞既特色，大「LEYLAND」
仲有個「L」旋風logo，成件事真係好型
車尾齊水牌
另外講講，一模多用就係有咁既缺點，九巴雞既死氣喉出口，車尾電池總掣位置
嶼巴雞都唔係同一個位，唔改模直接出，呢啲位出晒事
好有霸氣呀
合照時間
![[photo]](https://hkbf.org/images/smilies/Photo.gif "傾偈無圖無偈傾")
第5架大雞車，九巴既紅燈籠，半米半紅，50週年，應該都冇乜機會會追返黎入手啦
之後唔知仲會出咩款，雞車要玩款真係可以有排玩
即使係同款車，每架細節都不盡相同
今次呢架嶼巴雞，同九巴雞同模，但閘門頂既位置，就只得G36一架多左個遮蔽既位置
東梅古道，你行到嗎？
30年過去，而家雙層巴士又再次返返去梅窩，又一番新景象
THX FOR READING
![[banghead]](https://hkbf.org/images/smilies/icon_banghead.gif "我撞牆死左佢算啦！"){kind=icon}
