(麻帆良市心跳巴士迷俱樂部會長 Monika 報導)
總部位於英國伯明翰嘅都城嘉慕威曼 (Metro-Cammell Weymann, MCW)
係一間喺 1932 年由 Metro-Cammell 嘅巴士部門同 Weymann Motor Bodies 合組而成嘅公司,
以製造巴士車身起家, 及至 1970 年代, 瑞典嘅 Scania 覬覦英國嘅巴士市場,
於是同 MCW 合作推出新巴士, 先後推出單層巴士 Metro-Scania 同雙層巴士 Metropolitan,
但係市場反應同銷售成績都不如預期理想, 其後兩間公司分道揚鑣。
MCW 喺吸收左同 Scania 合作生產巴士嘅經驗之後, 決定自主研發全新雙層巴士底盤,
再加上自家製作嘅車身, 成為 MCW 首款自家製作嘅新巴士 -- Metrobus, 並且喺 1977 年首度亮相,
新巴士甫一出場, 瞬即受到英國巴士公司嘅追捧, 當中 London Transport,
以及 MCW 總部所在地伯明翰嘅 West Midlands Passenger Transport Executive,
各以過千架巴士嘅數目成為呢款巴士嘅最大用家,
亦令 MCW 晉身成為一間擁有製造巴士底盤與製造巴士車身能力同時兼備嘅公司。
MCW 於 1981 年為香港打造全港首款 12 米三軸雙層巴士 -- Super Metrobus 12m,
並且製造出五架樣辧車, 分別比中巴同九巴試用。
九巴引入其中三架巴士 (車隊編號 M1-3, 後來改編為 3M1-3) 試用之後,
雖然基於某些原因, 九巴並冇再引入同款巴士, 但係亦因此而開始同 MCW 有左合作關係。
九巴喺 1983 至 1989 年間購入合共 88 架兩軸版本嘅 MCW Metrobus 9.7m MKII 雙層巴士 (M1 - 88),
佢地使用與 Super Metrobus 12m 巴士同款, 由 MCW 同廠提供嘅 Apollo II 型車身,
其中 M1-30 使用與 3M1-3 相同嘅車頭細路線牌箱設計, 由 M31 開始使用面積較大嘅車頭路線牌箱,
佢地主要使用 Gardner 6LXB 引擎同 Voith DIWA 851 三前速自動波箱嘅機槭配搭,
部份則使用 Cummins LT10-B245 引擎同 Voith DIWA 863 波箱, 以應付部份需要攀斜嘅路線,
而最後八架 Metrobus 9,7m 巴士 (M81 -88), 更配用馬力更強大,
付有 Aftercooler 嘅 Cummins LTA10-B282 引擎同 Voith DIWA 864G 四前速自動波箱,
用以應付行走九巴最艱辛嘅路線, 途經荃錦公路嘅 51 號線登上大帽山嘅極端陡斜路段。
由於 M81-88 經過多年喺荃錦公路嘅上山下斜, 令巴士底盤出現超負荷現象, 損耗亦比其他同款巴士為快,
有巴士嘅底盤大陣甚至出現裂痕, 九巴唯有將佢地嘅 "爬山裝備" --
引擎、波箱同特別為呢批巴士裝設嘅手動減速器拆除, 並且抽調部份 "市區版" Metrobus,
再將 "爬山裝備" 移殖到佢地身上, 繼續 51 號嘅 "爬山使命",
而呢八架巴士嘅機械配搭亦同其他被抽調改裝嘅"市區版" Metrobus 對調,
換成只有 178 匹馬力嘅 Gardner 6LXB 引擎同 Voith 三前速自動波箱, 並且陸續退出 51 號,
行走其他路線直至退役, 而 Metrobus 9.7m 亦成為九巴至今唯一一款行走過荃錦公路嘅雙層巴士。
雖然只有 88 架同款巴士, 但係佢地卻神出鬼沒, 除左其中部份巴士喺 51 號線轉為全線使用空調巴士行走之前,
要上大帽山路線比較固定之外, 喺港九新界都有機會見到佢地嘅縱影。
呢款巴士喺九巴車隊前後服役左達廿年之久, 除左部份因為金屬疲勞導致底盤損毀而直接提早退役之外,
最後服役於九巴車隊嘅 Metrobus 9.7m 雙層巴士, 直至 2003 年正式退役。
今日, 心跳巴士迷俱樂部隆重歡迎九巴 MCW Metrobus 9.7m 雙層巴士登場!
MCW Metrobus 呢款被稱為 "M仔" 或者九巴內部稱為 "鯊仔" 嘅巴士,
對市長 Super Bus 嚟講可以話帶有好多回憶,
Super Bus 話佢第一次認識呢款巴士, 係 1985 年有一次喺電視度,
睇到無線電視廣告宣傳 IYY 國際青少年節, 並且揾來兩架上有相關宣傳廣告嘅九巴巴士亮相,
當時對巴士型號認識尚淺嘅佢, 雖然仲未知道佢地叫 Metrobus,
但係佢地車身嘅線條同車頭設計都比當時九巴車隊常見嘅巴士款式新穎得多,
尤其是佢車頭上層車窗頂部呈 "八字眉" 嘅設計, 比人一種憂鬱嘅感覺,
而呢個上層車窗嘅設計喺英國本土使用嘅同款車身 Metrobus 亦未有使用過嘅,
加上車咀嘅 MCW 標誌, 都令佢留下深刻嘅印象,
後來有一日亞嫲帶佢同四姨婆一齊喺佐敦道碼頭坐 30 號入荃灣,
30 號當時就係用呢款巴士行走嘅, 但係好唔好彩地,
巴士去到上海街差唔多到旺角嘅時候比後面另一架巴士收掣不及 "隊蘿柚",
雖然冇人受傷但係亦因為咁而要𨍭坐下一班車繼續行程,
不過最令 Super Bus 印象深刻嘅, 莫過於佢 90 年升中一嘅時候啦,
身為紅磡人嘅佢, 升中一要去九龍塘返學, 12A 就成為左佢日後嘅返學線,
佢話記得當時 12A 仲有好幾部 M 仔行, 最記得其中兩架 CZ6482 (M18) 同 DH508 (M74),
佢地行車時嘅感覺令 Super Bus 為之陶醉, 後來唔知點解呢啲巴士突然間消聲匿跡調走哂,
得番 "雞寶套餐", 即係俗稱 "雞車" 嘅勝利二型同平頂寶、圓頂寶巴士行走,
後來一次入觀塘, 經過牛頭角見到架 CZ6482 去左行 42C,
鍾意 Metrobus 嘅乘坐感覺嘅佢, 頓時感覺 12A 好似變左學似以前巴士討論區 HKBDB 有人自創嘅潮語 --
做左食柴線, 即係指用舊車嘅路線, 心中有點不快,
值得一提嘅, 係 M74 後來亦喺 1995 年被選中並且改裝成為行走 51 號緣攀爬大帽山嘅其中一員,
車咀更因此 "破相", 以加強換左大馬力引擎之後車頭水箱嘅散熱效果。
後來 92 年有一次返學, 喺黃埔花園等車竟然遇到九巴 M 仔嘅老大--
本文主角之一嘅 M1, 佢話其時 M1 應該已經做左後備車, 或者 "牛雜車",
即係冇固定行走嘅路線, 果日返學坐正 M1 行 12A 簡直印象深刻,
佢仲記得當時坐近上車門位, 去到機利士南路等燈位果陣個司機同隔離線架巴士上嘅同事吹水,
隔離線架巴士個司機仲講左一句: "M1 啵!" Super Bus 話雖然此後喺 12A 想再坐到 M 仔嘅機會幾乎等於零,
但係喺紅磡區其實仲有一條線仲可以坐到呢款巴士, 就係 15 號,
作為當時九龍灣廠嘅派車路線, Metrobus M 仔亦係呢條線嘅主打車之一,
佢話有時週末想去觀塘, 或者想入藍田八佰伴同果度嘅九巴服務站睇野,
就必定要坐 15 號, 亦好大機會坐到呢款 M 仔,
佢仲話最記得係 M23 同 M24 呢兩架巴士, 其中 M23 因為佢嘅車牌 DD364 最有印象,
而 M24 就曾經上過 "齊滅罪 護法紀" 嘅政府全車身宣傳廣告,
後來就喺荃灣見到佢被改裝左行 51 號上大帽山, 時為 1995 年左右。
除左行市區路線之外,呢款 Metrobus "鯊仔"亦都有行過海線,
當中包括 104、109、110、113、170 同 606 等路線,
有部份巴士亦上左令人印象深刻嘅車身全廣, 例如八佰伴、三越百貨、出前一丁、
有線電視、同埋萬事發、沙龍、總督等煙草廣告, 仲有一啲政府宣傳廣告,
例如上文提及嘅 "齊滅罪 護法紀"、機警先生嘅 "店舖盜竊是一項罪行 切勿以身試法",
同埋區域市政局嘅 "為己為人 不應光顧無牌小販" 等等,
同時亦見證左佢地喺九巴車隊服役嘅光輝歲月, 同香港一段美好嘅時光。
今日, 我地好高興迎接呢兩架九巴 MCW Metrobus 9.7m 巴士,
M1 同 M28, 將佢地昔日嘅風采, 喺今日再度重現大家眼前!!
隆重歡迎! 九巴 MCW Metrobus 9.7m 雙層巴士, 見參!!
M1 @ 30, 證書編號 0145, 限量推出 800 架
M28 @ 113, 證書編號 0082, 限量推出 800 架
正式落地!! 心跳巴士迷俱樂部歡迎您!!
M1 @ 30
M1 行 30 號, 雖然在下未坐過, 但係 92 年有一朝搭 12A 返學卻有幸成為坐上客,算係有緣嘅一次相會啦, 同樣地未坐過 M1 行 30 號, 但係細個同亞嫲就坐過其他 M 仔行 30 號,
印象中係後期嘅大牌箱款式, 世事就係咁奇妙~
果次比你坐到呢款車一定高興到想跳起啦~!都有啲興奮㗎! 不過真係只此一次咯, 本來 90 年升中一果陣都有 M 仔行㗎, 幾乎日日返學放學都坐到,
雖然自從某日啲 M 仔調走哂之後日日都要坐雞車珍寶返學放學, 成日都有嫌 12A 用車舊,
不過依家諗番以前坐雞寶套餐都有唔少中學回憶嘅~
原本以佐敦道碼頭為總站嘅 30 號, 喺 1991 年 10 月縮短至長沙灣, 班次亦較為疏落
M28 @ 113
M28 曾經以呢個車身標語, 參加英國嘅宣傳活動
回應本文標題: MCW + KMB = ?
答案: A PARTNERSHIP FOR BETTER PUBLIC TRANSPORT
九巴同 MCW 嘅合作關係到底有幾密切? 由呢架 M28 左右兩邊車身嘅中英對照宣傳字句已經可見一斑,
呢個合作關係一直到 1989 年 MCW 因為陷入財政困難而結束業務為止
細牌箱與細牌箱, 左邊嘅 606 係樹脂膠車, 同今次呢兩架 M 仔原屬同廠出品,
該廠後來推出呢款模型嘅合金版時本來係非官方出品, 其後模具被另一間公司購入,
從而出現今日呢兩架官方版, 右邊嘅 18 就係 Corgi 喺 2000 年嘅出品
三架唔同廠出品嘅 M 仔, 一齊來一個對比
真車
當 M1 遇上 M1, 九巴第一架三軸版 Metrobus 12m 初時的確係以 M1 作車隊編號,
後來由於Metrobus 9.7m 嘅引入, 於是改以 3M 作編號開首, 取其三軸嘅意思
九巴的 Metrobus
喺香港自有我自己第一架相機以來, 原來影過呢款巴士嘅相片亦唔係好多,細牌箱 M 仔更係只此一張, 姊妹車 M14 (CZ5866) 行走 61X, 攝於 1995 年九龍城碼頭,
61X 當時最常使用兩軸巴士, 計有 Dennis Dominator 同勝利二型,
間中亦會有十一米三軸車行走, 最記得有一次坐 61X 入屯門就坐中吉龍 S3N,
"爬山版" Metrobus 9.7m, 排隊末嘅 M88, 喺被改裝 "降格" 成為 "市區" 巴士並且逐出大帽山之後,
亦曾經行過 61X, 尤記得一次喺九龍城碼頭等 61X 入屯門九巴車廠影相, 就搭中呢架 M88,
車長仲同我講: "呢架車曾經上過大帽山㗎!" 雖然已經被廢武功, 但係當時坐佢行龍翔道同屯門公路果陣,
感覺亦係另一番滋味, 或者係因為在下對呢款 Metrobus 有一份特別嘅情意結啦!
真係估唔到原來呢款巴士都有行過屯公啵, 咁架 M88 如果冇改裝行屯公會唔會仲爽呢~?不過屯門公路嘅路面環境彎多又起伏不斷,果陣架 M88 行大帽山行左都起碼有五、六年, 係咁日日上上落落, 個底盤都已經承受左好大負荷,
雖然換左引擎馬力冇咁大, 但係如果佢唔係滿座或者都仲可以,
如果架車頂閘仲要谷佢行屯公我都真係怕佢會頂唔住,
佢咁都仲可以捱到 2003 年先至退都算幾硬淨啦!
And......
Thanks for reading~
