抱歉了，你唔係中巴架ＤＳ６，所以冇信心（並沒有）
![[sosad]](https://hkbf.org/images/smilies/icon_sosad.gif "So Sad"){kind=icon}
相信大家都睇到悶，因為又係我，又係１／４３。又係勝利２型
今次就係一架特別啲既大比例雞車：九巴學雞
先黎外盒，繼續係一個紙皮箱
每次都唔大分別既紙箱我每次都影，係因為由呢到開始開箱，成件事好有儀式感，當然應該只有我係咁覺得
第２個外盒，用訓練色既塗裝作為外盒，都叫有少少野睇下
開黎見我
繼續係本體，證書，再加一張水貼
好鬼靚仔，最重要係出左咁多次九巴雞車，今次終於用返黑色水撥
唔係話真車有冇用銀色水撥既關係，而係黑色水撥用起模型上真係順眼好多
車尾。。。。。。
係咪又好似爭咁啲野呢？
上面講既水貼係時候出場，大剪刀一剪，點解會多左一張跌出黎？
原來係有兩張水貼跟埋，由拎出黎到剪落去果一刻，都冇為意有兩張疊埋左
勝利２型訓練巴
加返個「學」字，醒神晒 
當年既訓練巴，車身既「廣告」係幾有美感
而家限左要用歐５車去做訓練巴，車款算係新，但車身色就用返晒金身，偶爾幾架貼貼紙廣告就算，感覺上成件事冇晒特色
再加上近年既「九巴美學」，算了唔好搞咁多整色整水
加多個學神牌既車尾，多返啲野睇下
另外路線牌既膠邊位都油埋車身色，係幾特別，印象中有啲係連路線牌塊玻璃都油埋白色
簡單而又不失美感既車身字句，再加一個校章款既九巴學院LOGO，唔計車款的話係幾靚架
雖然果陣都覺得啲車係幾殘就是
之後就黎睇下細節位啦，今次呢架都幾多野睇下，同平時買開既載客版有好多唔同
先黎路線牌，左側同車尾都冇野顯示，而車頭既「地點」位寫上「路線訓練」
平時唔係點睇字體有冇錯既我，今次都要讚下，真車四隻字係用「噴字模板」人手噴上去
所以字體筆順有好多斷開既地方，就係「噴字模板」冇辦法避免既事，模型忠實還原，值得一讚
正常既倒後鏡同魚眼鏡，加一對師傅鏡，但司機位呢邊同個師傅隔咁遠，好似都唔易睇
教車師傅：前面路口左轉
學神車長：咩話？
教車師傅：前面路口左轉呀
學神車長：你講咩話？
教車師傅：收油呀（重dup）
喂果張師傅位隔住副引擎，又同個學員距離咁遠，究竟聽唔聽得清楚啲指示架？
師傅位加學員位
師傅位既另一隻迫力腳掣，仲有為師傅而設既黃色扶手
法定載客人數１７人，再加門位既另一隻師傅鏡
為符合１７人既法定載客人數，下層上層都要拆走座位，下層得返１７個位既勝利２型。由３＋２變左做２＋２
其餘既地方空空如也
上層，甚麼都沒有
越玩越鐘意既一款模型
當１／７６都賣緊就黎＄５００一架既時候，１／４３賣＄１２００咁上下，真心抵玩
，同時亦反映出１／７６而家真心貴 
呢期屋企大翻新，所有模型都仲起個倉到，所以今次就冇合照圖啦
就快埋尾可以搬返黎住，以上既圖片都係新裝修後既地方拍攝
時間過得快，幾個月就咁過去
由牆身地磚到傢私設計，再到房間間隔，當初幾乎所有野都係自己度比裝修公司，裝修師傅再將我既諗法做返出黎
效果很滿意，都真係９０％以上還原返晒我諗既野，同埋一啲幾任性既要求
駛左唔少錢，而且要添置返啲家電家俱，不斷燒錢中，但都仲有心機買野玩，好大個小朋友呀
ＴＨＸ ＦＯＲ ＲＥＡＤＩＮＧ
![[photo]](https://hkbf.org/images/smilies/Photo.gif "傾偈無圖無偈傾")
