#1
(麻帆良市心跳巴士迷俱樂部會長 Monika 報導)
隨住車輛零排放嘅呼聲喺全球四起,
世界各汽車生產商都加入研發同生產電動車同零排放車輛嘅行列,
作為集體運輸工具嘅巴士, 自然亦唔會例外,
各款電動巴士同氫能巴士亦可見於世界各地嘅大小城市運作中,
有營運商同公交部門更定出時間表, 喺未來十至二十年內實現全車隊零排放嘅目標。
作為香港最大嘅專營巴士公司, 九巴亦公佈左喺 2050 年達至全車隊零排放嘅目標,
同時亦向各巴士製造商招標採購純電動雙層巴士, 北美巴士巨頭 NFI Group 旗下嘅 ADL,
喺 2022 年 3 月 23 日宣佈已經為九巴製造首批 10 架 Enviro 500 EV 12 米三軸電動雙層巴士。
該批巴士以原廠自家設計底盤為基礎, 每架巴士可載 122人,
新巴士裝配有由 ADL 自家設計, 容量達 472kWh 嘅電池, 配備由 Voith 提供,
最高輸出功率可達 410kW 嘅 Voith Electrical Drive System (VEDS) 驅動系統,
每次充電後可以有達 300 公里嘅續航力。其中首 2 輛於 2023 年 4 月下旬抵港,
為 ADL 喺亞太地區嘅首款電動雙層巴士, 亦係繼比亞迪嘅 B12D 之後, 九巴第二款電動雙層巴士。
同比亞迪 B12D 巴士一樣, Enviro500 EV 使用「電光綠」車身色彩,
並且喺兩邊車身以紅色線條刻畫出「Heartbeat of the City」,
同埋右邊車身下方 「Green is Good」嘅英文䓍書字樣。
新巴士喺之後幾個月喺多個公開活動向大眾展示, 直至今年兩架新巴士先至先後喺 2 月同 5 月正式出牌,
並且獲得 AED1 同 2 嘅車隊編號, 並且於 5 月 11 日首航 (AED = ADL Electric Double-decker 嘅意思,
唔係自動體外去顫器 Automated External/electronic Defibrillator 嘅簡寫。)
隨住新巴士亮相, 推出模型亦只係遲早嘅事。今日新到, 九巴 ADL Enviro500 EV 巴士,
兩架款式, 一架未出牌版本另一架首航 112, Super Bus 話本來只係想入 112, 最後兩架一齊入手。
講到電動巴士, Super Bus 話雖然佢喺 San Diego 呢度冇雙層巴士行走, 電動雙層巴士就更加唔洗講,
但係由幾年前開始, San Diego MTS 至今已經有廿多架電動巴士運行中,
佢亦曾經試坐過呢啲巴士幾次, 感覺行車時相當寧靜, 只係喺高速行走時有少量嘅摩打運轉聲,
但係天熱時因為空調系統運作嘅噪音頓時令寧願嘅車廂環境大煞風景,
不過總體來講佢對電動巴士印象都唔差, 不過 Super Bus 認為,
電動車始終都仲有一啲地方值得商榷, 以巴士來講, 首先車價,
一架電動巴士嘅身價已經等於一架半同級嘅柴油巴士嘅價錢, 甚至可能更多,
當中電池同摩打就係最貴嘅地方, 特別係電池, 經過無數次嘅充電放電,
電池嘅壽命到左盡頭就要更換電池, 又係一大筆金錢; 講到電池壽命,
雖然電動車電池嘅技術喺過去幾十年無疑有好多大改進, 令續航能力比以前有唔少嘅提升,
但係經過不停嘅充電使用, 續航力亦會比新落地時有所縮短。
至於環保方面, 因為電動車行走時冇廢氣產生, 唔會對空氣造成污染所以叫環保,
但係電池喺製造過程中環唔環保就見仁見智, 仲未計電池回收嘅過程有幾複雜,
再加上電池嘅安全問題, 電動巴士中途突然無故起火,
或者巴士喺車廠內燒車波及其他巴士亦已經試過。或者有人會反駁:「柴油巴士有時都會出事啦!」
但係 Super Bus 覺得佢都係要指出呢一點, 特別係大家都可能知道,
電動車因為電池有事而引發嘅火警, 因為電池內部嘅物質引起嘅化學反應,
令佢地比其他柴油同汽油動力嘅車輛引發嘅火警更難撲救。
總而言之, 電動巴士喺香港行走, 到底能唔夠可以好似其他柴油引擎巴士一樣,
有稱職嘅表現, 甚至行到十八年大限先至正式功成身退呢?
或者只有時間先至能夠作見證啦!
ADL Display 版, 證書編號 0706, 限量推出 900 架
首日航 112 版, 證書編號 0170, 限量推出 900 架
心跳巴士迷俱樂部, Sayori、Natsuki、Yuri 同 Monika,
帶您一齊感受九巴 ADL Enviro 500 EV 12 米三軸電動雙層巴士巴士帶來嘅心跳感覺!!
ADL Display 版
新巴士同時帶來 ADL 嘅新標誌
"Heart beat of the City"
"Green is Good"
首日航 112 版
車頂特寫, 留意太陽能板已經成為九巴新巴士嘅標準配備
Thanks for reading~
